Tur til Høgeheia - kjekt for både liten og stor!

Gjestbloggar denne veka er Gustav Skaar. Han er født og oppvaksen i Dale i Sunnfjord, og bur i dag i Stongfjorden i Askvoll. Gustav er ein aktiv friluftsmann og bloggar på gustavskaar.blogspot.com. Han deler flotte bilete på Facebooksida Mountains in Askvoll, og på Instagram - mountainsinaskvoll og gustavskaar.

Turen på Høgeheia startar i Holevika der vegen sluttar. 

Tur til Høgeheia - kjekt for både liten og stor!

• Kor: Stavenesodden i Askvoll kommune i Sogn og Fjordane. Om du køyrer frå Stongfjorden til Holevika finn du eit flott utgangspunkt for ein tur på Høgeheia.
• Høgd: 450 meter over havet
• Turlengde: Ein tur tek omlag ein times tid, avhengig av alder og form, og kva tid ein gir seg sjølv undervegs. Dette er ein relativt enkel tur.

Det flotte med Høgeheia her ute ytst mot havet, er at ein kan gå turen heile året. Utan ski og spesialutstyr. Den salte havlufta smeltar fort det som kjem av snø. Men om det frys på, kan det likevel vere godt å ha broddar i sekken. 

Ruta opp frå Holevika føl skaret til høgre på god sti.

Våren kjem alltid tidleg på kysten. Og i Holevika og langs stien oppover finn du ofte tidlege vårteikn. Kusymra pregar då lia oppover. Kvitveisen kjem endå tidlegare. Det er mange fin rasteplassar langs ruta oppover.
 Eit interessant kulturlandskap møter deg i Holevika. Her er gamle steingjerder og murar. Ein steinsett potetkjellar kanskje? Gamle tufter og brønnar. Den gode stien går opp langs hammaren mot sør. Allereie her er det flott utsikt ned til Holevika og havet og øyane i Florø. 

Det er mange  gamle murar og brønnar i Holevika

Vakre lauvtre prydar Holevika ei stund om hausten

Haust i Holevika

Stien går så gjennom eit lite granfelt, før den svingar beint til venstre opp over ein hammar. Hammaren er ikkje farleg å gå over. Stien svingar først til venstre og så til høgre. Her oppe får vi utsikt til Granesundet i Askvoll i sør, og til Furefjellet i vest. Rett over ytste pynten på Staveneset. 

Det er flott solnedgang på Høgeheia

Høgeheia er eit vakkert turmål heile året

Vi held så fram på god og merka sti til eit høgdedrag rett i aust. No dukkar Alden og Atløyna opp i sørvest. Eimind og Follevåg i sør. Vi ser Heggøyna og Smelvær i vest. Mot nord får vi utsikt til Florø. I aust ser vi den store varden på Høgeheia. 

Atløy, Alden, Heggøyna og Smelværet

Varden på Høgeheia

Ruta held no fram i småkuppert og ope landskap mot aust. Lettgådd. Toppen ser vi heile tida. Fint for små og eldre føter. Mot slutten av ruta er det ei lita stigning. Ikkje bratt. Brått ser vi varden rett framfor oss og vi er oppe. Og for ei panoramautsikt som møter oss. Mot aust ser vi til Grimelia,Toreheia, Stongfjorden, Blegja og alle dei andre fjella. Mot søraust ser vi Eidsfjorden og Follevåg. I sør ligg Eimind og Granesundet. I vest ligg Atløyna, Alden og øyane her. Og mot nord mellom anna Svanøy, Batalden, Askrova, Reksta, Skorpa og Kinn. I nordaust ser vi fjellheimen mot Ålfotbreen. Små og store båter kryssar nord/sør på det blå havet. Som ein forstår har Høgeheia fantastisk utsikt. Og knapt nokon plass på kysten får du eit vakrare skue når sola går i hav enn nettopp her. Høgeheia er eit must for alle. 

Elles kan ein nemne at det ligg fast trimbok her oppe. Lagt ut av "Vener av Høgeheia". Sjuande kvart år er også fjellet del av Fjelltrimmen til Askvoll og Holmedal Idrettslag (AHIL).  

Haust på Høgeheia

Seinsommar - Stongfjorden, Eidsfjorden og Follevåg

  

Haust på Høgeheia

Har du lyst til å ta deg ein tur? Det er mange flotte overnattingsstader og eteplassar i nærleiken. Askvoll Fjordhotell byr på overnatting og mat i Askvoll sentrum. Fjordlagunen byr på camping- og båtplassar som ligg lunt ved fjorden i Holmedal. Like ved ligg Smedhuset Kafé. Andre overnattingsstader å anbefale er Grandane Feriehus, Nesavika Fritid og Olaf Saltskår sine hytter.

Blir du svolten etter turen kan vi anbefale å leggje turen innom Askvoll Sjøbuer Mat og Drikke for eit smakfullt måltid ved sjøkanten!

God tur!

Høgeheia ligg på Stavenesodden ytst ute mot havet i Askvoll.