Fabelaktige Fjaler!

Ved den vakre Dalsfjorden i Sunnfjord ligg Fjaler kommune.
I tillegg til vakker natur er Fjaler rik på kultur og historie. 

 Laukelandsfossen ved Dalsfjorden er eit vakkert syn! Foto: Monika Johansen Haugen.

Fjaler kommune strekk seg ut på sørsida av den vakre Dalsfjorden, frå tettstaden og fjordbygda Dale midt inne i fjorden, og ut til Korssund og Fure ved kysten. I aust slyngjer Flekke- og Guddalsvassdraget seg frå den vakre Flekkefjorden til øverst på Guddal. I Fjaler kan du oppleve fjord, kyst og fjellnatur innan korte avstandar, spennande kulturattraksjonar og moderne kunst, design og handverk. 

Kommunesenteret Dale er ei idyllisk lita fjordbygd med det meste av servicetilbod og eit godt utval av butikkar. Allmuen Kafè og Interiør er noko så sjeldan som ein kombinasjon av hyggeleg kafèmiljø og sal av spanande mindre interiør til heimen. Dalsbua like ved er også ein spanande butikk for deg som jaktar på spesielle ferdaminne. Fossen Bryggeripub på kaia tilbyr god mat og kanskje det breiaste sortimentet av øl på vestlandet. På Dalsåsen, med fin utsikt over Dale og Dalsfjorden, tronar Nordisk Kunstnarsenter Dalsåsen.

 Kommunesenteret Dale ligg vakkert til ved Dalsfjorden. Foto: Monica Johansen Haugen.

Fjaler er eit eldorado for Iakse- og innlandsfiske. Flekke- og Guddalsvassdraget strekkjer seg om lag 30 km frå Flekkefjorden til fjellet i Guddal. Her kan du fiske både laks, sjøaure og røye. Vassdraget med alle vatna både i hovudvassdraget og i fjellet og naturen omkring gjev høve til mange flotte naturopplevinga.  Har du ikkje prøvd flugefiske før, så tilbyr Bjarne Huseklepp Fiskeskule effektive kurs i flugefiske. Her kan ein óg tinge seg guida fisketurar i vassdraget. Yndestad Gard og Hellebustfossen Hytter tilbyr overnatting og er behjelpelege med bestilling av fiskekort. 

Sesongen for laksefiske i Flekke- og Guddalsvassdraget er 1.juni – 31.august.

Prøv fiskelykka i Fjaler! Foto: T.W.S. Jakt og Fiske.

Yndestad Gard er ein flott base både for deg som er glad i fotturar og innlandsfiske. Her er også tilbod om kano, båt, hjortejakt og leirdueskyting. Garden har både rom til leige og campingplass, og tilbyr god, heimelaga tradisjonsmat. Yndestad Gard har tilbod på overnatting på vekedagar i sommar til kr 400,- per person, inkludert frukost.

www.yndestadgard.no

 

Idylliske Yndestad Gard ligg vakkert til i Guddalen.

Fjaler byr på flotte fot- og fjellturar, og kan skilte med heile 106 km med merka og rydda stiar. Dei fleste er gradert lett eller middels krevande. I Dale er den nye Elvestien i sentrum og langs Dalselva blitt svært populær, i tillegg til rundløypa til Grøneholten og Østenstad. Vil du ha ha fin utsikt over bygda og fjorden, kan du ta turen på Jarstadheia. Her kan du gå videre ned til Haugland. 

I ytre Fjaler er det populære turstiar til bl.a. Einingsfjellet, Bygdeheia og Nordsjøløypa i Korssund. Kring Straumsnes er det merka sti til Arsteinsheia, Vardeheia, og den nye Filosofigangen på Tysse, frå Lillingstonheimen og over Fredensborg. På Guddalen er det merka stiar til bl.a. Storevarden og Langevatnet. No er det også lett tilgang til det populære turområdet til Fossedalen på nordsida av Dalsfjorden, etter at Dalsfjordbrua opna. Frå Fossevika er det merka tursti til Heileberget. Full oversikt over alle stiane får du på turkartet for Fjaler og Hyllestad, i sal bl.a. i butikkane i Dale og på sørviskontoret i kommunehuset.

 Utsikt frå Heileberget i Fjaler. Foto: Linda Hovland.

Den folkekjære diktaren Jakob Sande var frå Fjaler, og barndomsheimen hans i Dale, Jakob Sande-tunet, er tilgjengeleg for publikum. I sommarsesongen er her kafé, bokutsal, museum, omvising og ulike arrangement. Omvising, servering og arrangement for grupper kan tingast heile året. Jakob Sande skreiv både humoristiske dikt og om meir klassiske tema som kjærleiken og døden. Hans mest kjente dikt er ”Det lyser i stille grender”, som seinare vart tonesatt.

I Dale kan du besøke barndomsheimen til Jakob Sande. Foto: Jakob Sande-tunet.

Delar av Den Trondhjemske Postveg går gjennom Fjaler. Vegen frå 1800-talet er kjenneteikna av mange vakre steinbruer og er eit flott område for fot- og sykkelturar. Postvegrittet i Dale, «Vestlandets tøffaste terrengritt», vert i 2014 arrangert 2.august. Delar av traseen til Postvegrittet går langs Den Trondhjemske Postveg. Postvegrittet har både konkurranseklasse, mosjonsklasse og eige sykkelritt for born. Deltaking i Postvegrittet gir også seeding til Birken!

Postvegrittet 2013. Foto: Monica Johansen Haugen.

Fine sommardagar er det godt å nyte badelivet - enten i Badevika i Dale, eller i ei av dei mange vikene i den idylliske Flekkefjorden. Haugland ved Flekkefjorden er ein ynda badestad, og her er det også innandørs badeland om godvèret uteblir (ope fredag 17-20 og sundag 11-17). Ei spektakulær oppleving er det óg å bade i kulpen under den flotte og majestetiske Laukelandsfossen på nordsida av Dalsfjorden, ikkje så langt frå Dale.
Hit lyt du komme med båt eller kajakk, så slik sett blir her aldri overbefolka.

 Laukelandsfossen er ein fin stad å stoppe om du er på padletur på Dalsfjorden.
Kanskje fristar det med eit bad óg?
Foto: Stine Bjørlykhaug.

Korssund er eit populært turmål både for dei som reiser med båt og dei som kjem landevegen. Staden har fått navnet sitt etter ein 4 meter høg steinkross som vart reist av kong Olav den Heilage om lag år 1030 under kristninga av Noreg. Korsen er av typen ”Olavskross”, og er ein av dei største i landet. Korssund er ei naturleg god hamn, og her er eit myldrande båtliv om sommaren. Å ferdast gjennom dei smale sunda er ei idyllisk båtreise. I dag er her butikk, kiosk, gjestehamn og campingplass. Merka turstiar, sykkelutleige, utesjakk, badeplass, grillplass og leikeplass. Ein møteplass for sjø og land i gamal og ny tid. 

 Steinkrossen i Korssund.

Dalsfjordveka (1.-10. august 2014) er ein festival med fokus på kulturopplevingar i landskapet. Arrangementa spenner frå trend til tradisjon, og er for heile familien. Arrangementa går føre seg i dei 3 kommunane rundt Dalsfjorden; Fjaler, Gaular og Askvoll. Spesielt populært er Kobbeskjerskveld på Haugland (8.august) og torgdagen i Dale med gatefest om kvelden (9.august). www.dalsfjordveka.no

Fjaler er ein kommune med sterke tradisjonar innan kultur. 25. til 28. september 2014 er det klart for teaterfestival i Fjaler med 9 planlagde førestillingar. Dette er andre året den spennande og heimekoselege teaterfestivalen vert arrangert. Her blir det både nasjonale og internasjonale innslag, og fleire arrangement utandørs.
www.teaterfestivalenifjaler.no  

Vekommen til Fjaler!

Nyttige linkar:
Fjaler kommune
Overnatting i Fjaler

Tips til påskeferien!

Lurer du på kva du skal i påskeferien? Her er nokre tips frå kysten av Sogn og Fjordane!

1. Fluefiskekurs i Fjaler

Flekke- og Guddalsvassdraget strekkjer seg om lag 30 km frå Flekkefjorden til fjellet i Guddal. Her er det god bestand av laks og sjøaure. Huseklepp Fiskeskule arrangerer intensivkurs i fluekasting 17.-19.april på kasteanlegget i Guddalen. Bruk påska på å lære noko nytt! Les meir om tilbodet her. 

  

2. Påske i fiskeværet Kalvåg

 

Kalvåg er eit idyllisk fiskevær i Bremanger kommune. I åra mellom 1850 og 1870 var det opp til 12.000 fiskarar i Kalvåg. Desse budde i losjiskip, enkle hus og rorbuer. Det hendte og at folk måtte sove under kvelva småbåtar. Den dag i dag vert nokre av dei same rorbuene nytta til å ta vare på reisande, ferierande og fiskarar, men med dagens krav til komfort og levevilkår.

Knutholmen og Kalvåg ønskjer velkommen til påskefeiring. Årets påske vil ha litt mindre snø i seg, men desto meir kos, påskeegg, krim og hygge. Knutholmen har laga eige tilbod for årets påskeferie, som kan bestillast her. 

 

Carolas Buaspa ligg eit steinkast frå Knutholmen og byr på herleg velvære i sjøhusmiljø. På spaet er det garantert sol og 28 grader - året rundt! Opningstider påske: onsdag-søndag 12.00-18.00. 

3. Familietur til Værlandet

Værlandet er ei idyllisk øygruppe, lengst vest i havet i Askvoll kommune. Ta med familien på påsketur og oppdag øyriket! Her kan små og store lære om sjøfugl på Norsk Sjøfuglsenter. Øyene byr også på flott turterreng for korte og lengre fotturar og ypperlege forhold for sykling, fiske og kajakkpadling. 

Overnatting i 2 netter på Værlandet Gjesteheim + fri inngang på Norsk Sjøfuglsenter. Pris kr 1600,- for 2 vaksne og 2 barn.

4. Skip o'hoi! 

Selskapet Butesail har base i Stongfjorden i Askvoll og tilbyr seglkurs og guida fjellturar. Kva med å kombinere begge deler? Du kan segle mellom toppane i havgapet og prøve deg på manøvrering undervegs. Ein kan enten overnatte ombord i båten eller på herskapelege Turner House i Stongfjorden. Les meir på www.butesail.com

5. Ut på tur, aldri sur! 

I regionen finn du mange merka turløyper i alle vanskegrader. Den milde vinteren med lite snø gjer at fleire av dei høge toppane er ypperlege for fotturar i påska. Kva med ein tur til Alden i Askvoll, også kjent som "Norskehesten"? Ta med deg familien på ein tur langs ei av dei mange Nordsjøløypene i regionen. Dette er lette turløyper som passar for alle, godt merka og med eigne starttavler og turkart.

6. Båtferie 

Kysten av Sogn og Fjordane har fleire av landets beste gjestehamner. Knutholmen i Kalvåg, Værlandet, Hardbakke i Solund og Dingja i Gulen er ofte med blant dei beste når årets gjestehamn skal kårast. Det er også fleire fine uthamner langs kysten. Vi har laga eiga brosjyre for gjestehamnene. Denne finn du her. La deg inspirere og legg ut på tur! 

7. Padling i havgapet

Med tusenvis av øyar, holmar og skjer er kysten av Sogn og Fjordane som skapt for padling. Øyriket i Solund, Gulen, Bulandet og Værlandet er Norges vestlegaste og godt kjent i padlemiljøet. Mylderet av små og store øyar, holmar og skjer gir ly for vind og bølgjer. Samtidig er vegen ut på storhavet kort. 

I Bremanger kan du padle langs kvite strender og stupbratte fjell. Opplev prehistoriske helleristningar, gamle handelsstader og eit rikt dyreliv. Også skjergarden rundt Florø byr på flotte forhold for padling. Ta turen til ein av dei mange øyane rundt byen eller langs ein av fjordane, som gir ly for vinden og fine forhold for padling. 

God påske!