10 toppturar langs FjordKysten

Det er mange flotte turmål langs kysten av Sogn og Fjordane. 

Her er våre tips til 10 flotte fot- og fjellturar for 2015!

10. Hovden rundt

Hovden er den nordlegaste og største øya i Flora kommune med sine 15 kvadratkilometer. Med fjell, fjellvatn og flatt terreng langs strandflata, svaberg, vikar og vågar er øya som skapt for fotturar og naturopplevingar. Her er vidt utsyn over skjergarden, ope hav og fastlandet i aust. På øya er det merka Nordsjøløype, og ein kan gå rundtur rundt øya. Rundturen rundt øya tek ca 5 timar (gangtid). Høgste punktet er Skårekinna på 310 m.o.h.

På nordvestsida av øya, ytterst i havgapet, ligg Kvanhovden Fyr. Heilt oppe på ei klippe ligg fyret, og herifrå har ein fantastisk utsikt over storhavet i vest. Å overnatte på fyret er ei storslått oppleving!

Nyttige linkar: 

Turbeskriving
Overnatting på Kvanhovden Fyr

Informasjon om øya Hovden

9.  Vardetur i Gulen

Alle foto: Ingvild Høydal.

Gulen byr på mange flotte fotturar. Ein flott dagstur er å gå Undertun - Ormekletten - Svabergfjellet - Flolidfjellet - Undertun. 

 

Denne turen syner vardane langs kysten og er med på å formidle historia om Leidangsvesenet som var det første organiserte sjøforsvaret i Norge. 

Undervegs på turen ser ein rett ned til tusenårsstaden Gulatinget frå 400 meters høgde. 

Høgste punkt på turen er Svabergfjellet med 546 m.o.h. Turen startar frå Undertun, rett aust for kommunesenteret Eivindvik. Ein bør rekne med å bruke minst 6 timar på heile rundturen. 

Nyttige linkar: 

Turbeskriving 
  Overnatting i Gulen

8. Heileberget ved Dalsfjorden

Foto: Ove Hovland.

Nyt utsikta over Dalsfjorden! Ein startar frå Ottersteinen, som ligg på nordsida av Dalsfjordbrua. Turen er godt merka til toppunktet Fløyen (761 m.o.h.), og her er det storslagen utsikt både over Dalsfjorden og til øyrika i vest. Turen er 8 km tur/retur, og tek omlag 3 timar.

Frå Fløyen kan ein også gå vidare vestover over Heileberget og ned til Rivedal. Over Heileberget er det flatt og fine bergparti, som det er lett å gå på. Denne turen tar omlag 5 timar.

Nyttige linkar: 

Turbeskriving

Overnatting i Fjaler

Overnatting i Askvoll

7. Pollatinden (541 m.o.h.)

Foto: Tor Arne Hauge.

Øyriket Solund byr på flotte fot- og fjellturar. I heile kommunen finn ein godt merka turstiar i variert terreng. Pollatinden (541 m.o.h.), den nest høgste toppen i kommunen, gir storslått utsikt over øyriket. 



Turen startar ved hovudvegen omlag 4 km aust for Hardbakke. Turen går for det meste på bart fjell og har i hovudsak jamn stigning. Stien er godt varda. Turen tar omlag 2,5 time tur/retur.

Nyttige linkar: 
Turbeskriving
Overnatting i Solund

6. Veten i Bremanger (527 m.o.h.)

Foto: Elisabeth Solbakken.

Turen til Veten startar på vakre Grotlesanden. Ein har flott utsikt til ein kjem opp på den første høgda, omlag 300 m.o.h. Herfrå går ein innover fjellet og det flatar ut. Det er eit par bratte stigningar til før ein når toppen, 527 m.o.h. Her er det flott utsikt mot Florø og Alden i sør og nordover mot Vågsøy og Stadlandet. Turen tar ca 2 timar opp og 1 time ned.

Kvart år i juli vert motbakkeløpet Veten Opp arrangert. 

Nyttige linkar:

Turbeskriving (Laila's turblogg)

Overnatting i Bremanger 

Motbakkeløpet Veten Opp

5. Blegja (1305 m.o.h.)

 Alle foto: Gustav Skaar.

Blegja i Askvoll blir gjerne kalt Dronninga blant fjella i Sunnfjord, og ikkje utan grunn. Med sine 1305 m.o.h. er Blegja den høgste fjelltoppen langs FjordKysten. Turen opp er krevjande, men naturopplevinga desto større. 

 

Frå toppen kan du nyte synet av Sogn og Fjordanes bratte fjellverden frå oven! Du ser den fantastiske vestlandsnaturen med fjord, fjell, isbre, øyar og hav så langt auge rekkjer. Blegja byr på utsikt heilt til Jostedalsbreen og dei 7 fjella rundt Bergen, 100 km vekke! 

Turen opp er krevjande og tek 5-6 timar i moderat tempo. ca. 9,8 km tur/retur.

Nyttige linkar: 

Turbeskriving

Overnatting i Askvoll

4. Store Batalden (492 m.o.h.) 

 Foto: Tore Jan Skarstein. 

Store Batalden er den høgste fjelltoppen på øyane vest for Florø. Frå toppen kan du nyte utsikten over mylderet av øyar som gjer skjergarden rundt Florø heilt unik! Turen til Store Batalden tek ca 2,5 timar, tur/retur. Løypa er middels krevjande, og burde passe for dei fleste som er vant med å gå i ulendt terreng.

På Store Batalden kan du også besøke den prisbelønte Batalden Havbu med museum, kunstutstilling og overnatting. Batalden Havbu har mellom anna blitt tildelt Olavsrosa for si formidling av kystkultur.

Nyttige linkar: 

Turbeskriving

Batalden Havbu

Overnatting i Flora kommune

3. Lihesten (777 m.o.h.)

Lihesten er eit særprega fjell og flott turmål! Foto: Håkon Haukøy. 

Lihesten i Hyllestad er eit majestetisk og sagnomsus fjell. Fjellet reiser seg 777 m.o.h. og er eit av dei mest markante fjella langs kysten av Sogn og Fjordane. Lihesten har eit tilrettelagt stinett med stiar av varierande grad. Vi anbefalar å ta turen som ein heildagstur, slik at ein har ein god tid til å utforske det flotte fjellplatået.

Dei fleste vel Lekva som utgangspunkt for turen, og då særleg om turmålet er Gygrekjeften, 714 m.o.h. 

 

Dei tøffaste (eller galnaste) beveger seg ut på kanten av Gygrekjeften. 

Foto: Sigurd Sandvik.

Kvart år i juni vert turmarsjen "Lihestklyvet" arrangert. Undervegs passerer deltakarane forbi 3 L-stølane (Lekva, Lundeland, Lireid), der den lokale styrkedrikken Gygreskvetten vert servert. 

Nyttige linkar: 
Turbeskriving
Overnatting i Hyllestad 

2. Alden (481 m.o.h.)

Foto: Kieran Kolle. 

Topptur til øya Alden og fjellet "Norskehesten" er eit høgdepunkt på kysten av Sogn og Fjordane. Alden ligg utanfor Askvoll og er eit kjent seglingsmerke på vestlandskysten.

 Til den austre toppen tek turen ca 1,5 time opp og ein drøy time ned.

Ein fin sommartur er å overnatte i telt på Alden. Å sjå sola synke i havet i vest og vakne opp til ein tidleg soloppgang i aust er ei flott naturoppleving. 

 Alden i solnedgang. Foto: May-Britt Tangenes.

Like ved Alden ligg øygruppa Værlandet og Bulandet. Her ligg øyane som perler på ei snor, vakkert bundne saman av Nordsjøporten - ein 5 km lang veg med 6 bruer. På Værlandet og Bulandet kan du oppleve unik natur, havfiske, vakre fotturar og eit ope folkeslag. Å sykle langs Nordsjøporten er ei flott oppleving. Dei mange øyane som skjermar for vind og bølger, samt den korte vegen ut på storhavet, gjer øygruppa til eit eldorado for kajakkpadlarar. 

 Foto: Kieran Kolle.

På Værlandet kan ein komme tett på den majestetiske havørna; både på Norsk Sjøfuglsenter og på havørnsafari. 

Kom tett på havørna! Foto: Geir Olsen.

Kvart år i juli vert Nordsjøsporthelga arrangert. Her er motbakkeløpet "Alden Opp" ein del av programmet. 

Nyttige linkar: 
Turbeskriving
Overnatting i Askvoll 
Norsk Sjøfuglsenter 

1. Hornelen (860 m.o.h.) 

Hornelen er med sine 860 stupbratte meter over havet Europas høgste sjøklippe. 
Har du endå ikkje vore på Hornelen veit du kor du bør leggje turen i 2015!


 
Storslått utsikt frå toppen av Hornelen. Foto: Birgitte Bjørdal.

Dette er turen for deg som er ute etter ei spektakulær oppleving. Stien kan vere nokså krevjande og bratt, men til gjengjeld kan ein nyte fantastisk utsikt undervegs. På toppen er det storslått panoramautsikt sørover kysten, nordover til Sunnmøre og innover fylket. Her ser du det varierte landskapet regionen har å by på – alt frå tronge fjordar og høge fjell til små øyer ytst i havgapet. Viss du tørr kan du leggje deg på kanten av stupet og kikke nesten loddret ned på båttrafikken 860 meter under deg.. 



Foto: Norway AdvenTURes

Delar av løypa har bratte oppstigningar, og er krevjande. Turen passar for dei som er vant med å gå i fjellet og i ulendt terreng. Å gå opp Hornelen er ein heil dagstur, men det er vel verdt strevet! 



Nedstigning mot Berleneset.

 Det er to ruter opp til Hornelen, med start frå enten Hunskår eller Berlenset. Den flottaste utsikten får du om du går opp frå Hunskår og ned til Berleneset.



 Nyttige linkar: 
Turbeskriving
Overnatting i Bremanger 

God tur!  

Topptur til Hornelen - Europas høgste sjøklippe!

Tekst og bilete: Svenn-Petter Kjerpeset.

Hornelen - stille og vakker er du, men óg lunefull og farleg. På fine dagar er turen til Hornelen ei fantastisk oppleving, med utsikt over det meste av fjella i Bremanger kommune. Men i skodde og regn kan det vere ein skummel tur, med glatt føre og dårleg sikt. Oppe på toppen er det ein del sprekkar i fjellet, så ein bør følgje den T-merka ruta opp.

Hornelen i Bremanger er Europas høgste sjøklippe.

Tur til Hornelen med Keipen Turlag, ein søndag i juli 2013. 

Eg såg ut vindauge at skodda låg ned i fjellet - skulle nok ein tur bli avlyst på grunn av dårlig vêr? Vel, Jens Petter og Mina skulle vere med på turen, så vi sette oss i bilen og køyrte til Hunskår. Etter at Bortnetunnelen opna er det berre ca. 30 min å køyre frå Svelgen til Hunskår. Turleiarane på turen var Gunnar og Gisle Skjølberg. Gunnar har vel vore 100 gongar på Hornelen, så han kjenner turen godt. 

 Starten av løypa på Hunskår.

Etter at siste mann dukka opp var vi 19 personar som skulle på tur. Problemet var berre at skodda låg nede i fjellet, men Gunnar meinte at den skulle lette etter kvart. Så vi rusla avgårde. Når det har regna er den fyrste delen av turen den våtast å gå, og til dels glatt då det renn vatn i stien. Fyrste del av turen opp Middagsnakken til Nonsnakken er òg den tyngste delen av turen, då ein stig 400 meter på 1,5 km. 

Mina på 13 år klarte oppstiginga greitt, men synest det var litt tungt - fortsatt låg skodda ned i fjellet, så vi tok ein liten matpause. Det var fleire som var på tur den dagen, og eit par passerte oss på vegen. Desse traff vi att på oppe på platået då dei var på veg ned. "Ingen utsikt, berre skodde" sa dei. Skulle dette møte oss på toppen? Ja, ja - i eit turlag går vi så fort som sistemann. Litt før ei bratt oppstigning vart det nok ein matpause, og det virka då som skodda letta i same tempo som vi gjekk. 

For dei med høgdeskrekk kan det første partiet frå Hunskår vere litt vanskeleg å passere. Går ein ned til Berleneset unngår ein dette partiet på veg ned, og då går resten av turen som ein leik. 

Når en kjem opp på platået går turen eit stykke bortover før en ser baksida av Hornelen. Der stod vi og såg toppen dekka i skodde. Men, den letta i vårt tempo. Skulle vi få utsikt frå toppen? På dette punktet står ein på 780 høgdemeter, før ein går ned til ca 710 meter. Der kjem ein inn på den T-merka turen frå Berleneset. Herfrå og fram til siste del av løypa er det greit å gå. Det renn vatn ved sida av stien, så her er det berre å fylle drikkeflaska. Det ligg òg eit vatn like før en startar på steinura opp til toppen. 

Vel oppe på Hornelen hadde skodda letta og vi fikk ein fantastisk utsikt. Gunnar sette flagget på varden ved Olavsbu. 

 Flagget blir sett opp på toppen!

 Det var litt kald vind, men den la ingen dempar på opplevinga. Mange bilete vart tatt og enkelte må berre heilt fram på kanten, der ein ser 860 meter rett ned i fjorden!

Frå kanten ser ein 860 stupbratte meter rett ned i fjorden.

 Frå toppen kan ein nyte utsikt over fjell, fjord og hav!

Heile turfølgjet samla. 

Tilbake gjekk turen ned til Berleneset. No var skodda heilt vekke og vi kunne nyte ein fantastisk utsikt over Frøysjøen, fjella i syningom, Hennøya og øyane vest mot storhavet. 

Flott utsikt på veg ned. 

Mina på 13 år var yngst på turen. Ho låg midt i feltet og klarte turen heilt fint.

Takk til Gunnar og Gisle Skjølberg som var turleiarar for Keipen Turlag sin tur til Hornelen i 2013!

 

Om løypene:

 
T-turane til Hornelen har 2 startpunkt; eit frå Berleneset og eit frå Hunskår. Turen frå Berleneset til Hornelen er ca. 8 km. Frå Hunskår til Hornelen er det ca. 6.2 km. Er ein fleire som går i lag på tur kan ein sette ein bil ved Berleneset, for så å gå opp frå Hunskår og ned att til Berleneset. Dette gir den flottaste opplevinga! Hugs å ta vare på augneblinken når du står på toppen av Hornelen -  her har du ein fantastisk 360 graders utsikt!

 Utsikt til Berleneset.

For dei som likar å fiske ørret er det fleire vatn i området. Ein kan ta med telt og overnatte ved Stormyrvatnet der ein kan sjå sola gå ned vest i havet. 

Keipen Turlag har tur til Hornelen 20.7.2014 frå Hunskår. 

God tur og velkomen til Bremanger kommune!

Praktisk om turen:

 Høgde: 860 m.o.h.
Tid: 8-10 timar tur/retur.

Nyttige linkar:

Overnatting i Bremanger
Turbeskrivelse Hornelen
Keipen Turlag
Norway Adventures
(guida turar til Hornelen)

Bremanger - naturopplevingar i verdsklasse!

Bremanger byr på naturopplevingar i verdsklasse. På få timar kan du oppleve alt frå storhavet til isbreen! Bestig Europas høgste sjøklippe, nyt late sommardagar på krittkvite strender eller besøk det sjarmerande fiskeværet Kalvåg.

Utsikt på veg ned Veten, med Grotlesanden i bakgrunnen. Foto: Elisabeth Solbakken. 

Bremanger byr på mange flotte og varierte fjellturar. Ein finn spektakulære toppturar og flotte vandreruter i heile kommunen. Høgdepunktet er Hornelen, som med sine 860 m.o.h. er Europas høgste sjøklippe. Ein kan også ta ein tur til Ålfotbreen, som er Norges vestlegaste isbre. Ønskjer du ei lettare utfordring er ein tur opp Veten (527 m.o.h.) å anbefale. Turen startar frå den flotte sandstranda Grotlesanden. Kvart år i juli vert motbakkeløpet ”Veten Opp” arrangert. Det er også mange flotte og varierte turar rundt kommunesenteret Svelgen. Totalt er det meir enn 100 merka og tilrettelagte turløyper i kommunen, og det er gitt ut eiga turbok med beskrivelse av turane.

Utsikt frå Hornelen, Europas høgste sjøklippe! Foto: Birgitte Bjørdal. 

Norway Adventures tilbyr guida turar både til Hornelen og Ålfotbreen, og også til lettare turmål om ein ønskjer det.

Fiskeværet Kalvåg i Bremanger. Foto: Knutholmen.

Idylliske Kalvåg er eit av vestlandets best bevarte fiskevær. Rundt vågen ligg sjøhusa tett i tett og dannar ei intim atmosfære. Her kan du overnatte i rorbu og så å sei fiske frå stoveglaset! Du kan besøke det gamle sildesalteriet, gå på flotte fjellturar eller ta ein fisketur. Du kan óg få vere med på buavandring og få eit interessant innblikk i kystkulturen – og kanskje ser du havørna.

Familiebedrifta Knutholmen i Kalvåg er kjent for sitt gode vertskap.
Foto: Knutholmen/David Zadig.

Velrennomerte Knutholmen er hjerte i bygda med overnatting, restaurant, gjestehamn og selskapslokale. Restauranten har kortreist mat frå havet som spesialitet, med "havets festbord" som sitt varemerke!

Nyt kortreist mat frå havet i Kalvåg. Foto: Knutholmen.

Carolas Buaspa ligg eit steinkast frå Knutholmen og tilbyr herleg velvære i sjøhusmiljø.
Her kan du få herleg velværebehandling, slappe av i utandørs boblebad eller nyte sol og 28 grader på innandørs sandstrand! På Galleri Frøya kan du få kunstnerisk påfyll gjennom ulike aktivitetar eller handle små og store kunstverk i butikken.

På Carolas Buaspa kan du nyte sol og strandliv - heile året! Foto: Carolas Buaspa.

Det er ikkje berre i Kalvåg du kan nyte strandlivet - Bremanger har nokre av vestlandets aller flottaste strender. Nyt strandlivet på Grotlesanden i reine, flotte omgjevnader. Grotlesanden er lett tilgjengeleg med bil eller båt. Vetvika er ei idyllisk sandstrand utan vegsamband. Hit kan du anten komme til fots på merka sti eller med båt.

Den vakre sandstranda i Vetvika. Foto: Kåre O Svarstad.
Vil du prøve fiskelykka, er Bremanger plassen for deg. Her ligg forholda til rette for fiske i sjøen, enten innaskjærs eller til havs. Føretrekk du ferskvassfiske er det svært gode forhold med meir enn 100 fiskevatn. Bremanger er også eit eldorado for kajakkpadling og dykking. Norway Adventures tilbyr guida kajakkturar og kurs, i tillegg til ei rekke andre aktivitetar.

Bremanger byr på mange spennande arrangement gjennom heile året. I sommar er Opplev Bremanger og Kalvåg Kystfestival to høgdepunkt. Opplev Bremanger byr på ti dagar fullspekka med variert sommarmoro for alle aldersgrupper, frå fredag 4. til søndag 13.juli. Her blir det varierte konsertar og aktivitetar for heile familien. Blant anna kan ein oppleve konsert på den vakre sandstranda i Vetvika! Kalvåg Kystfestival vert arrangert frå 1.-3. august. Dette er eit populært arrangement med familieaktivitetar, konsertar, utstillingar og kulturelle innslag. I 2014 står mellom anna Waterboys, Ole Ivars, Dans With A Stranger og Claudia Scott på scena.

The Waterboys er klare for Kalvåg Kystfestival. Foto: The Waterboys.


Bremanger har ei rik historie. Helleristningsfeltet Vingen er eit av dei største i Nord-Europa. Her er det avdekka over 2200 ristningar, som truleg er 4000-6000 år gamle. Om sommaren kan ein vere med på guida tur til Vingen. Området er verna, og kun organisert ferdsel er tillate. I Bremanger finn du 2 historiske handelsstadar frå 1600 talet, i Rugsund og Smørhamn. Begge desse er restaurerte og tilbyr overnatting og opplevingar. Dei gamle handelsstadane var knutepunkt på kysten i gammal tid. Rugsund har også gjestehamn. Eit eldorado for båtturistar, dykkarar og andre som nyttar sjøen til rekreasjon. Tongane Kystfort er eit av dei tyske festningsverka på kysten av Noreg under 2. verdskrigen. Store delar av festningsverket står framleis att, mellom anna hovudkanon og mannskaps/offiserbrakke.

Helleristningar i Vingen. Foto: Bremanger kommune. 
 

Velkomen til minnerike opplevingar i Bremanger!

Nyttige linkar:
Bremanger kommune
Bremanger Turistinformasjon
Overnatting i Bremanger