10 toppturar langs FjordKysten

Det er mange flotte turmål langs kysten av Sogn og Fjordane. 

Her er våre tips til 10 flotte fot- og fjellturar for 2015!

10. Hovden rundt

Hovden er den nordlegaste og største øya i Flora kommune med sine 15 kvadratkilometer. Med fjell, fjellvatn og flatt terreng langs strandflata, svaberg, vikar og vågar er øya som skapt for fotturar og naturopplevingar. Her er vidt utsyn over skjergarden, ope hav og fastlandet i aust. På øya er det merka Nordsjøløype, og ein kan gå rundtur rundt øya. Rundturen rundt øya tek ca 5 timar (gangtid). Høgste punktet er Skårekinna på 310 m.o.h.

På nordvestsida av øya, ytterst i havgapet, ligg Kvanhovden Fyr. Heilt oppe på ei klippe ligg fyret, og herifrå har ein fantastisk utsikt over storhavet i vest. Å overnatte på fyret er ei storslått oppleving!

Nyttige linkar: 

Turbeskriving
Overnatting på Kvanhovden Fyr

Informasjon om øya Hovden

9.  Vardetur i Gulen

Alle foto: Ingvild Høydal.

Gulen byr på mange flotte fotturar. Ein flott dagstur er å gå Undertun - Ormekletten - Svabergfjellet - Flolidfjellet - Undertun. 

 

Denne turen syner vardane langs kysten og er med på å formidle historia om Leidangsvesenet som var det første organiserte sjøforsvaret i Norge. 

Undervegs på turen ser ein rett ned til tusenårsstaden Gulatinget frå 400 meters høgde. 

Høgste punkt på turen er Svabergfjellet med 546 m.o.h. Turen startar frå Undertun, rett aust for kommunesenteret Eivindvik. Ein bør rekne med å bruke minst 6 timar på heile rundturen. 

Nyttige linkar: 

Turbeskriving 
  Overnatting i Gulen

8. Heileberget ved Dalsfjorden

Foto: Ove Hovland.

Nyt utsikta over Dalsfjorden! Ein startar frå Ottersteinen, som ligg på nordsida av Dalsfjordbrua. Turen er godt merka til toppunktet Fløyen (761 m.o.h.), og her er det storslagen utsikt både over Dalsfjorden og til øyrika i vest. Turen er 8 km tur/retur, og tek omlag 3 timar.

Frå Fløyen kan ein også gå vidare vestover over Heileberget og ned til Rivedal. Over Heileberget er det flatt og fine bergparti, som det er lett å gå på. Denne turen tar omlag 5 timar.

Nyttige linkar: 

Turbeskriving

Overnatting i Fjaler

Overnatting i Askvoll

7. Pollatinden (541 m.o.h.)

Foto: Tor Arne Hauge.

Øyriket Solund byr på flotte fot- og fjellturar. I heile kommunen finn ein godt merka turstiar i variert terreng. Pollatinden (541 m.o.h.), den nest høgste toppen i kommunen, gir storslått utsikt over øyriket. 



Turen startar ved hovudvegen omlag 4 km aust for Hardbakke. Turen går for det meste på bart fjell og har i hovudsak jamn stigning. Stien er godt varda. Turen tar omlag 2,5 time tur/retur.

Nyttige linkar: 
Turbeskriving
Overnatting i Solund

6. Veten i Bremanger (527 m.o.h.)

Foto: Elisabeth Solbakken.

Turen til Veten startar på vakre Grotlesanden. Ein har flott utsikt til ein kjem opp på den første høgda, omlag 300 m.o.h. Herfrå går ein innover fjellet og det flatar ut. Det er eit par bratte stigningar til før ein når toppen, 527 m.o.h. Her er det flott utsikt mot Florø og Alden i sør og nordover mot Vågsøy og Stadlandet. Turen tar ca 2 timar opp og 1 time ned.

Kvart år i juli vert motbakkeløpet Veten Opp arrangert. 

Nyttige linkar:

Turbeskriving (Laila's turblogg)

Overnatting i Bremanger 

Motbakkeløpet Veten Opp

5. Blegja (1305 m.o.h.)

 Alle foto: Gustav Skaar.

Blegja i Askvoll blir gjerne kalt Dronninga blant fjella i Sunnfjord, og ikkje utan grunn. Med sine 1305 m.o.h. er Blegja den høgste fjelltoppen langs FjordKysten. Turen opp er krevjande, men naturopplevinga desto større. 

 

Frå toppen kan du nyte synet av Sogn og Fjordanes bratte fjellverden frå oven! Du ser den fantastiske vestlandsnaturen med fjord, fjell, isbre, øyar og hav så langt auge rekkjer. Blegja byr på utsikt heilt til Jostedalsbreen og dei 7 fjella rundt Bergen, 100 km vekke! 

Turen opp er krevjande og tek 5-6 timar i moderat tempo. ca. 9,8 km tur/retur.

Nyttige linkar: 

Turbeskriving

Overnatting i Askvoll

4. Store Batalden (492 m.o.h.) 

 Foto: Tore Jan Skarstein. 

Store Batalden er den høgste fjelltoppen på øyane vest for Florø. Frå toppen kan du nyte utsikten over mylderet av øyar som gjer skjergarden rundt Florø heilt unik! Turen til Store Batalden tek ca 2,5 timar, tur/retur. Løypa er middels krevjande, og burde passe for dei fleste som er vant med å gå i ulendt terreng.

På Store Batalden kan du også besøke den prisbelønte Batalden Havbu med museum, kunstutstilling og overnatting. Batalden Havbu har mellom anna blitt tildelt Olavsrosa for si formidling av kystkultur.

Nyttige linkar: 

Turbeskriving

Batalden Havbu

Overnatting i Flora kommune

3. Lihesten (777 m.o.h.)

Lihesten er eit særprega fjell og flott turmål! Foto: Håkon Haukøy. 

Lihesten i Hyllestad er eit majestetisk og sagnomsus fjell. Fjellet reiser seg 777 m.o.h. og er eit av dei mest markante fjella langs kysten av Sogn og Fjordane. Lihesten har eit tilrettelagt stinett med stiar av varierande grad. Vi anbefalar å ta turen som ein heildagstur, slik at ein har ein god tid til å utforske det flotte fjellplatået.

Dei fleste vel Lekva som utgangspunkt for turen, og då særleg om turmålet er Gygrekjeften, 714 m.o.h. 

 

Dei tøffaste (eller galnaste) beveger seg ut på kanten av Gygrekjeften. 

Foto: Sigurd Sandvik.

Kvart år i juni vert turmarsjen "Lihestklyvet" arrangert. Undervegs passerer deltakarane forbi 3 L-stølane (Lekva, Lundeland, Lireid), der den lokale styrkedrikken Gygreskvetten vert servert. 

Nyttige linkar: 
Turbeskriving
Overnatting i Hyllestad 

2. Alden (481 m.o.h.)

Foto: Kieran Kolle. 

Topptur til øya Alden og fjellet "Norskehesten" er eit høgdepunkt på kysten av Sogn og Fjordane. Alden ligg utanfor Askvoll og er eit kjent seglingsmerke på vestlandskysten.

 Til den austre toppen tek turen ca 1,5 time opp og ein drøy time ned.

Ein fin sommartur er å overnatte i telt på Alden. Å sjå sola synke i havet i vest og vakne opp til ein tidleg soloppgang i aust er ei flott naturoppleving. 

 Alden i solnedgang. Foto: May-Britt Tangenes.

Like ved Alden ligg øygruppa Værlandet og Bulandet. Her ligg øyane som perler på ei snor, vakkert bundne saman av Nordsjøporten - ein 5 km lang veg med 6 bruer. På Værlandet og Bulandet kan du oppleve unik natur, havfiske, vakre fotturar og eit ope folkeslag. Å sykle langs Nordsjøporten er ei flott oppleving. Dei mange øyane som skjermar for vind og bølger, samt den korte vegen ut på storhavet, gjer øygruppa til eit eldorado for kajakkpadlarar. 

 Foto: Kieran Kolle.

På Værlandet kan ein komme tett på den majestetiske havørna; både på Norsk Sjøfuglsenter og på havørnsafari. 

Kom tett på havørna! Foto: Geir Olsen.

Kvart år i juli vert Nordsjøsporthelga arrangert. Her er motbakkeløpet "Alden Opp" ein del av programmet. 

Nyttige linkar: 
Turbeskriving
Overnatting i Askvoll 
Norsk Sjøfuglsenter 

1. Hornelen (860 m.o.h.) 

Hornelen er med sine 860 stupbratte meter over havet Europas høgste sjøklippe. 
Har du endå ikkje vore på Hornelen veit du kor du bør leggje turen i 2015!


 
Storslått utsikt frå toppen av Hornelen. Foto: Birgitte Bjørdal.

Dette er turen for deg som er ute etter ei spektakulær oppleving. Stien kan vere nokså krevjande og bratt, men til gjengjeld kan ein nyte fantastisk utsikt undervegs. På toppen er det storslått panoramautsikt sørover kysten, nordover til Sunnmøre og innover fylket. Her ser du det varierte landskapet regionen har å by på – alt frå tronge fjordar og høge fjell til små øyer ytst i havgapet. Viss du tørr kan du leggje deg på kanten av stupet og kikke nesten loddret ned på båttrafikken 860 meter under deg.. 



Foto: Norway AdvenTURes

Delar av løypa har bratte oppstigningar, og er krevjande. Turen passar for dei som er vant med å gå i fjellet og i ulendt terreng. Å gå opp Hornelen er ein heil dagstur, men det er vel verdt strevet! 



Nedstigning mot Berleneset.

 Det er to ruter opp til Hornelen, med start frå enten Hunskår eller Berlenset. Den flottaste utsikten får du om du går opp frå Hunskår og ned til Berleneset.



 Nyttige linkar: 
Turbeskriving
Overnatting i Bremanger 

God tur!  

Topptur til Lihesten

Tekst og foto: Håkon Haukøy.

Lihesten, det særmerkte fjellmasssivet i Hyllestad som reiser seg mellom Åfjorden, Lifjorden, Sognefjorden, Tollesundet og Storakersundet, har noko spesielt tiltrekkjande ved seg.

Først og fremst er det eit fantastisk friluftsområdet for fjellfolket, men for dei med spesielle interesser som jakt, fiske eller fjellklatring, vil Lihesten vere ein draumestad. Her finn du utfordringar og her finn du dei store opplevingane; heile tida omkransa av ein fantastisk og sjeldan vakker natur.

 Naturen rundt Lihesten er slåande vakker.

 

STINETTET

Frå Lifjordvegen under Lihesten er det tre moglege utgangspunkt for fjellvandraren. Dei fleste vel Lekva som utgangspunkt for turen, og då særleg om turmålet er Gygrekjeften, 714 m.o.h. På Lekva, om lag 4 km frå Hyllestad sentrum, er det god parkeringsplass. Vel du å gå mot Risnesnipa, 777 m.o.h. først, er det mest fornuftig å starta oppstigninga frå Risnes eller Hovland. Hovudstinettet oppe på fjellplatået er forsvarleg varda og merka, og såleis skulle Lihesten vere ein sikker og grei tumleplass for friluftsfolket, men skulle skodda koma på deg, må du for all del halde deg til merka løyper.

Skoggrensa passert og utsikta opnar seg. 
Bilete teke frå oppstigning frå Lekva og utsyn mot Risnesnipa.

NIPESTIEN

Turgåarar som kjem til Hyllestad, har høyrt at Nipestien opp mot Gygrekjeften skal vere luftig og utfordrande – og det stemmer! Men dette er i grunnen ingen tursti, men ein snarveg mot toppen som krev skikkeleg armstyrke, klårt hovud og ansvar for dei som er med i fylgjet. Stien er i dag ikkje forsvarleg sikra, og bør ikkje nyttast. Vi håpar at god og teneleg sikring skal vere på plass til tursesongen 2015.

Fjellvande turlagsfolk vil ta oppstigning via Nipestien. Her passering av første hinder.
 

”HAVØRN”- ULUKKA

Møter du Lihesten for første gong ein regntung morgon, og skodda heng tjukk ned mot Lifjorden, vil du synast dette er trasige greier og kryp kortaste vegen inn i teltet att og ned i soveposen. Nett slik var veret ein junimorgon i 1936 då ruteflyet ”Havørn” rende i den stupbratte Risnesnipa, like under toppen. Alle sju om bord omkom. Dette var den største og mest alvorlege flyulukka i Noreg fram til då. I juni 2008 vart flyulukka markert med ein minnestein.

”LIHEST-KLYVET”

Kjent og populær både for folk i Hyllestad og folk utabygdes frå, er den årvisse turmarsjen ”Lihest-klyvet”. I 2014 startar marsjen på Lekva sundag 8. juni klokka 09.30 og endar opp på Gygrekjeften. Undervegs passerer deltakarane forbi 3 L-stølane (Lekva, Lundeland, Lireid) der styrkedrikken Gygreskvetten vert servert. På Gygrekjeften er det utdeling av deltakarmerke med Lihest-motiv, og spesiell premiering ved 5 -, 10-, 15– og 20 gongs dekltaking. Vanlegvis vert Lihest-klyvet arrangert andre sundag i juni.

 

Glade fjellfolk på Gygrekjeften i Lihestklyvet 2013.
Det blir delt ut flotte premiar til dei som har vore med 5, 10, 15 og 20 gonger! 

LEGG GJERNE NEDTUREN OM RISNESNIPA

Etter matpause, godprat og fotografering på toppen går det på snauberg og snøfonner raskt unna mot 3L-stølane att. Dei mest spretne kan leggje turen bortom Jordevatnet, eitt av dei mange små og store vatn som ligg som sølvblenkjande klattar i store og små søkk over heile fjellet. Jordevatnet har underjordisk og undersjøisk utlaup ein stad i Åfjorden.                                                                                    

 Turfolk i samla tropp og topp humør og form protesterer ikkje om kursen så vert sett mot høgste toppen i Hyllestad, knapt 1,5 timars trasking litt opp og litt ned, men mest bort mot 777 meter-over-havet-varden på Risnesnipa. Utsynet herifrå må berre opplevast; du ser vidt og langt, i alle fall når lufta er som ho brukar å vere på forsommardagane.

  Etter ein fantastisk dag på Lihesten er flokken samla ved varden på Risnesnipa.
No står berre att nedstigninga til Hovland - ei grei løype.

Siste etappe over Lihesten kan så byrja, nedstigninga mot Hovland i Lifjorden. Friskt på alle måtar: sildrebekkar og småfossar med iskaldt vatn frå snøsmeltinga, luftig utsyn over Lifjorden, Sognefjorden, Sognesjøen, fastland og øyriket. - Ja, kor begynner havet eigentleg, undrast ein hollendar som gledde seg over at han vart med på ein vakker tur på trolske Lihesten.  Ei lita dagsreis seinare har du igjen oljegrus under beina på vegen forbi Hovland.

TIDER OG STADER

Vel du å leggje fotturen til Lihesten ein godversdag, må du bruke dagen på dette markante fjellmassivet. Frå sjøen ser det ikkje så overveldande stort ut, men først når du er oppe på fjellplatået, ser du dei store avstandane. Sjølvsagt er det dei som gjer turen frå Lekva til Gygrekjeften og nedatt på 2 – 3 timar, men opplevinga vert tilsvarande minimert. Bruk dagen!

Det tøffaste (eller galnaste) bevegar seg heilt ut på Gygretanna, 711 m.o.h.!

Vil du besøkje trimpostane på Lihesten, Gygrekjeften, 3L-stølane og Risnesnipa, må du rekne med at turen tek 6 – 8 timar.  Båtfolk som vitjar Hyllestad, finn merka stiar frå Risnes, Portevika og Storaker. Frå Portevika/Storaker er det kring 8 km med kupert terreng austover mot 3L-stølane, og ei heilt spesiell naturoppleving får du når du vandrar nedatt mot vest og strålane frå ettermiddagssola forgyller øyriket i vest; Solund, Bulandet, Værlandet og Alden.   

God tur, og nyt stunda!      


NYTTIGE FAKTA
 
Kart 
Turkart Hyllestad-Fjaler (utgjeven 2012)
Statens Kartverk Blad 1117 II Risnesøyna  

Turlengd
Hovland - Risnesnipa 3,6 km
Lekva - 3L-stølane - Gygrekjeften 5,2 km
  Lekva - 3L-stølane -Hovland 8 km
3L-stølane - Jordevatnet 1,7 km
Portevika/Storaker - 3L-stølane 8 km

Link til overnatting i Hyllestad.

Flora - opplevingar frå bre til hav!

Flora kommune er spekka med varierte opplevingar. Her finn du ein skjergard med eit mylder av små og store øyar og eit innland med brusande elvar, vakre fjelltoppar, isbre og stille vatn. Ut mot havet ligg Norges vestlegaste by - Florø. Florø har eit sjarmerande bymiljø og er kjent for store årlege arrangement som Kinnaspelet og verdas lengste sildebord.

 Florø ligg vakkert til i havgapet, omkransa av fjell, fjord og eit mylder av øyer. 

Foto: Rune Helland.

Florø er ein sjarmerande småby med eit pulserande næringsliv i utviking. Byen ligg vakkert til i havgapet, omkransa av fjell, fjordar og ein fantastisk skjergard i vest. Florø er dermed eit perfekt utgangspunkt for aktivitetar som fiske, fjellturar, båtliv, sykling og kajakkpadling. Her kan ein kombinere byliv og aktivitetsferie!

Nyt småbyidyllen i Florø.

 

Sild er viktig i Florø. Byen vart i si tid stifta på bakgrunn av det store sildefisket i regionen. I dag feirar ein silda ved å dekke opp til verdas lengste sildebord - midt i hovudgata i byen. Sildebordet vert arrangert i juni kvart år. Her vert det servert fleire gode silderettar, og alle får ete seg mette - heilt gratis! Ein kan prøve spennande rettar som banansild, rømmesild og fruktsild. I tillegg vert årets sildekonge kåra, og det er underhaldning frå scena. I 2014 vert sildebordet arrangert 20.juni.

 Sildebordet er ein årleg folkefest i Florø! Foto: Truls Kleiven.

Øya Kinn, vest for Florø, er verdt eit besøk. Her ligg ei vakker steinkyrkje frå middelalderen, bygd på 1100-talet. Om sommaren kan ein vere med på guida tur til Kinn. Øya er også eit populært turmål. Ein tur opp Kinnaklova, som er eit karakteristiske fjell og eit kjent seglingsmerke, er ei flott oppleving. Det er merka tursti rundt øya. 

 Besøk Kinn og den vakre Kinnakyrkja. Foto: Gry Seim.

Kinn er også ramme for det historiske spelet Kinnaspelet - Songen ved det store djup. Spelet handlar om tru og tvil, kjærleik og svik. Naturen på Kinn gir spelet ei storslått ramme - publikum sit i eit naturleg amfi under Kinnafjellet, med grøne bakkar, blått hav, høg himmel og den vakre Kinnakyrkja som kulissar. Kinnaspelet er i dag eit av dei eldste og mest veletablerte historiske spela i Norge. Kinnaspelet vert arrangert samme helg som sildebordet, og 21.-22.juni 2014 feirar Kinnaspelet 30. års-jubileum! 

Kinnaspelet feirer 30.års-jubileum i 2014. Foto: Kinnaspelet.

9.-13.juli 2014 går hav- og fjellsportfestivalen Våt Moro av stabelen. Våt Moro er ein festival som skal skape ekstrem glede, adrenalin og spektakulære opplevingar på sjøen og i fjella i området rundt Noregs vestligaste by – Florø. Senter for alle aktivitetar er Florø sentrum og Florevika. I fire dagar vil eit stort antall bedrifter, lag, organisasjonar og frivillige i aldre aldre være engasjert i festivalen. Dykking, segling, wakeboard, kiting, surfing, standup padling, havrafting, klatring, paragliding og kajakkpadling er berre nokre av aktivitetane Florø byr på desse dagane.

Bli med på Våt Moro i sommar! Foto: Eivind N. Hauge. 

 

Flora kommune byr på mange flotte fot- og fjellturar, både på øyane i vest og fastlandet i aust. Store Batalden (492 m.o.h.) og Kinn er populære turmål på øyane, det same er Hatlesetnipa (583 m.o.h) og Blåbrebru (800 m.o.h.) på fastlandet. Ålfotbreen (1379 m.o.h.) er den høgste toppen i kommunen. Brandsøyåsen er eit populært turmål i Florø, der ein frå toppen (293 m.o.h.) har flott utsikt over byen og naturen rundt. Ønskjer ein lettare turar har Storeåsen i Florø fint turterreng. Ein kan også gå til Gapahuken på Klavelandet eller ei av Nordsjøløypene i kommunen.

 Brandsøyåsen er eit sentrumsnært turmål med flott utsikt. Foto: Truls Kleiven.

Skjergarden utanfor Florø byr på eit eldorado av små og store øyar. Lokale rutebåtar har fleire daglege avgangar til øyane. Dette gjer det lett å utforske øyriket - enten på ein dagstur, rundtur eller turar over fleire dagar. Fleire av øyane har overnattingsmoglegheiter. 

På øya Reksta ligg fiskevêret Rognaldsvåg med ein sjeldan bygningsmasse av våningshus, naust og buer. Rognaldsvåg er rik på atmosfære og kulturminne som gravplassar og hustufter frå vikingtida. Ein fottur over og rundt øya er ei flott oppleving. 

 Utsikt over Rognaldsvåg. Foto: Laila Schønhardt.

På Store Batalden kan du besøke Batalden Havbu med museum, galleri og overnatting. Ein tur til toppen av øya gir deg storslått utsikt over mylderet av øyer langs kysten! Dette er ein av dei mest populære toppturane på øyane rundt Florø. 

 Nyt storslått utsikt frå toppen av Store Batalden (492 m.o.h.). Foto: Marit Hjortung.

Svanøy er den sørlegaste og frodigaste øya i Flora kommune, og har i tillegg ei rik og spennande historie. Øya var lenge eit sentrum i Sunnfjord, og her fins mange kulturhistoriske spor. Den staselege hovedgården ligg vakkert til med utsyn over Svanøybukt og Brufjorden. Heilt sidan vikingtida har Svanøy vore eit knutepunkt langs kysten. Svanøy Hovedgård var både adelssete og bispegods. Norsk Hjortesenter ligg idyllisk til på Kvalstad Gard på sørsida av øya. Dei drive med oppdrett av hjort og dåhjort. Ei omvising blant dyra vil gje deg ei oppleving du seint vil gløyme.  

 Herskapelege Svanøy Hovedgård er rik på historie.

Hovden er den største øya i kommunen, og eit perfekt utgangspunkt for fotturar. Her finn du blant anna flotte Nordsjøløyper som går over fjellet og rundt øya, der ein har utsikt til både skjergarden og ope hav. Kvanhovden Fyr, som ligg på ei klippe 40 meter over havet, er eit populært turmål på øya. Det er også mogleg å overnatte på fyret - ei spektakulær oppleving! 

 Vakre Kvanhovden Fyr ligg på øya Hovden.

Askrova er ei idyllisk øy, perfekt for sykling og fotturar. Det er eit løypenett på fjellet over øya med godt tilrettelagte turstiar. Syklar kan ein leige på butikken ved kaia. Her er det også gjestebrygge og pub/kro. Øya Tansøy ligg like ved, berre det 100 meter breie Tansøysundet skil dei to øyane. På Askrova kan ein utforske "Trollhola", ei hole frå urtida. Hola er på storleik med ein katedral og inneheld fleire holegangar, eit vakkert og svært spennande naturfenomen. Askrova har fleire årlege arrangement, som Øyacup i fotball og fiskekonkurranse.

 Askrova har flott turterreng. 

I Flora kan du også oppleve innlandsnatur på sitt beste. Norddalsfjord er eit eldorado for fiske i vatn, elv og sjø. Bygda er kjent for godt jaktterreng for hjort og er også eit godt utgangspunkt for fotturar. Eikefjord er ei flott og idyllisk bygd. Her finn ein gode fiskemoglegheiter både i elv, vatn og i sjøen. Båthamna i Eikefjord ligg fint plassert ved sidan av ei flott badestrand som er tilrettelagt for funksjonshemma. Skogs- og fjellområda rundt Eikefjord byr på mange flotte turopplevingar. 

 Området rundt Eikefjord byr på fantastisk turterreng. Foto: Laila Schønhardt.

Flora kommune er også rik på historie. Ausevika Helleristningsfelt ligg ca 40 min med bil frå Florø, i retning Stavang. Her ligg eit av dei største helleristningsfelta i Norge, med over 3000 år gamle figurar. Feltet viser over 300 ristningar, både dyre- og menneskefigurar. På kystmuseet i Florø kan ein sjå utstillingar om byen si utvikling frå 1860 til i dag, utstilling om båtar frå Sunnfjord og Nordfjord, samt ei eiga oljeutstilling.

Velkommen til Flora!

Nyttige linkar:

Overnatting i Florø
Flora kommune

Byen Vår Florø